«Գեղեցկության գաղտնիքը բացահայտված է»-Իրինա Թովմասյան

Այս զրույցը երբեք չեմ մոռանա: Որքան մեծ նվիրումով էր Իրինան երեխաների հետ զբաղվում և պատասխանում հարցերին, որ անկախ իմ կամքի աչքերս հուզմունքից արցունքոտվում էին: Խոստանում եմ, որ շատ շուտով նաև հարցարզույց կունենամ Ալյայի և Մարիայի հետ: Միայն մեկ բան կհավելեմ մեր զրույցին, որը արվեց փոքրիկների հետ.
- Ինչու՞ է մայրիկն այսքան գեղեցիկ:
- Դուք գիտեք, որ ես շատ ընկերներ ունեմ, բայց ինքը իմնա, որովհետև նա իմ մաման ա... դրա համար էլ սիրունա: ( Ալյա)

- Իմ մաման իմ համար գանձա... ( Մարիա)

Ամեն դեպքում ես  կարողացա բացահայտել Իրինա Թովմասյանի գեղեցկության գաղտնիքը: 

Իրինա տարիներ է արդեն, որ չեք մասնակցում գեղեցկության մրցույթներին, սակայն Դուք չեք կորցրել ձեր անունն ու տեղը այդ ասպարեզում: Հետաքրքիր է իմանալ ո՞րն է գաղտնիքը միշտ արդի լինելու:

Հարցին կարող եմ շատ երկար պատասխանել, բայց թող պատասխանս հնչի այսպես... որովհետև ունեմ երեք աղջիկ: Երեք աղջիկներ, ովքեր միշտ ուզում են մասնակցել մրցույթների, ստանալ մրցանակներ, և այդ ժամանակ ուզես, թե չուզես, պետք է միշտ լինես նրանց  համար օրինակելի:

 Մոտ մեկ ամիս առաջ գիտության և դպրության օրն էր՝ սեպտեմբերի 1 ը: Ինչպե՞ս էիք պատրաստվել այս գեղեցիկ օրվան:

Մեր գործունեությունը քանի որ հիմնականում կապված է երեխաների հետ, ուստի նշեմ, որ հաղորդումների թեմաները բնականաբար կապված են գիտելիքի օրվա հետ: Դեռևս 11-րդ տարին է, որ այդ օրը՝ սեպտեմբերի 1-ը, մեր տանը միայն Մեգգիի համար է, սակայն եկող տարվանից սկսված մեր բնակարանում կհնչի երկրորդ զանգը՝ Ալյան ևս կհաճախի դպրոց:

Ձեր երեխաները ընտրել են բեմական արվեստը` երաժշտության ճյուղը: Ինչպե՞ս վերաբերվեցիք այն հանգամանքին, որ Մեգգիից հետո,  մյուս երկու արևները պետք է լինեն շոուբիզնեսի ոլորտում, և  արդյո՞ք աջակցություն լինում է մայրիկի կամ հայրիկի կողմից:

Ունենալով տանը արտիստիկ աղջիկ (խոսքս վերաբերվում է մեծ աղջկաս՝ Մեգգիին), 15 տարի շարունակ երբեք թույլ չի տվել, որ երեկոները տխրենք: Դեռ մանկուց մեր տանը միշտ եղել է երգ ու պար: Բնականաբար, հետագայում, երբ ծնվեցին  մյուս երկու փոքրիկներս,  ինչ տեսնում էին Մեգգիից, փորձում էին կրկնօրինակել: Նրա խանդավառությունը փոխանցվել էր նաև փորքիկներին, և տեսնելով, որ Մեգգին երգում և պարում է, նույնը ցանկացան: Սակայն ես երբեք կողմ չէի լինի այս ամենին, եթե չնկատեի, որ ունեն ընդունակություններ և բացարձակ լսողություններ, որը ևս նախապես ստուգվել է մասնագետների կողմից: Հավելեմ խոսքիս, եթե կան տվյալներ ու կա մեծ ցանկություն, և ես առաջնահերթ նկատում եմ, որ այն ինչ արվում է նրանց կողմից, կատարվում է մեծ սիրով, բնական է պետք է ողջունեմ և ինձանից կստանան յուրաքանչյուր աջակցություն:

Ձեր կյանքում մինչ ամուսնությունը ձեռքբերումները շատ են եղել, իսկ  դրանից հետո գլխավորները՝ երեք դստրերի  լույսաշխարհ գալը: Հետաքրքիր է նաև իմանալ ի՞նչ ակնկալիքներ ունեք կյանքից և ի՞նչ նվերներ եք դեռևս  կյանքից նախատեսում:

Ճիշտ նկատառում էր՝ իմ ամենամեծ ձեռքբերումները իմ ընտանիքն է և 3 բալիկներս: Իմ ձեռքբերումներից են նաև իմ ընկերները,  մասնագիտությունս՝ որպես շուկայագետ, և աշխատանքային փորձս: Այս ամենի հետ հանդերձ կարող եմ վստահ ասել, որ իմ ձեռքբերումները շա՜տ են: Իսկ կյանքից նոր բաներ սպասելիս ասելով, հասկանում եմ՝  իմ երեխաների ձեռքբերումները,  նրանց հաջողությունները, որոնք նաև համարում եմ իմը: Օրեր առաջ ես իմացա, որ Մեգգին արդեն երկրորդ տարին  անվճար է  սովորելու, ո՞նց կարող եմ սա նաև իմ ձեռքբերումը չհամարել:

Իրինա ջան, տարիներ ի վեր, աշխատելով փոքրիկների հետ, հետաքրքիր է իմանալ, որպես պրոդյուսեր ինչպիսի՞ մոտեցումներ եք ցուցաբերում երեխաներին, որ ճիշտ համագործակցություն լինի թե՛ փոքրիկ արտիստների և թե՛ նրանց ծնողների հետ:

Ընդհանրապես, երբ սիրում ես երեխաներին՝ իսկ դա մեր գործի մեջ ամենակարևորն է, ամեն ինչ ստացվում է: Կարևոր է նաև ունենալ համբերություն, քանի որ մենք շփվում ենք նաև գերակտիվ երեխաների հետ: Առանց համբերության  անհնարին է: Կարևոր է նաև ծնողի վստահությունը: Նրանք ինձ վստահում են, քանի որ տեսնում են կատարածս աշխատանքը բալիկներիս վրա: Ամենալավ օրինակը իմ երեխաներն են:

Ձեր ծնողների կողմից տրված դաստիարակության մոտեցումներով եք աշխատում, թե՞ դուք ուրիշ մոտեցում ունեք:

Իմ ծնողների կողմից տրված դաստիարակությունը չի կարող իմ մեջ նստած չլինել: Սակայն յուրաքանչյուր մարդ ինքն իրենով անհատականություն է, ինքը դառնում է հենց այն մարդը, ով  տարիների ընթացքում է ձևավորվում որպես անհատ:

Բնավորության ո՞ր գծի համար են սիրում Իրինային ընկերները և կա՞ մի գիծ, որ կուզեիք փոխել:

 Հաճախակի ինձ այսօրինակ հարց է տրվում, թե ինչպե՞ս եմ կարողանում այս տարիքում գտնել նոր ընկերներ, շփվել նրանց հետ և լինել նույնքան պարզ ու անկեղծ, լինել այդքան հասանելի բոլորի համար: Բացարտրեմ այսպես. Հին ընկերների տեղը ոչ ոք չի կարող գրավել, սակայն նորերի մեջ էլ եմ գտնում անփոխարինելի մարդիկ, և առհասարակ սիրում եմ նոր բաներ փորձել, լինել նոր բնագավառներում, և չեմ վախենում ունենալ նոր ծանոթություններ և նոր շրջապատ:

 Իսկ վերջում կա նաև բլից հարցեր…

Ի՞նչ է Իրինայի համար հավատքը:

Հավատքը… ամեն բան լավ կլինի, քանի որ Աստված միշտ ինձ հետ է, բայց միևնույն ժամանակ պետք չէ մոռանալ բարություն անելու մասին:

Ո՞ր կենդանուն եք ավելի շատ նմանեցնում ձեզ:

Եղնիկին և վայրի ձիուն

Գիրք, որն ընթերցելուց հետո մեծ հետք է եղել ձեր կյանքում:

«Կարմիրն ու սևը»

Ինչպե՞ս կանվանեիք ձեր կյանքի պատմությունը:

«Սեր, որն ամեն ինչի սկիզբն է»

Եվ վերջում 3 բան, որ անցավ այս պահին ձեր մտքով:

Երեխաներս, աշխատանքս, մայրիկս

Շնորհակալ ենք զրույցի համար: 

Հարցազրույցն անցկացրեց Արամ Խաչատրյանը / ԱՐԽԱ