«Կյանքը կարող է աքացի տալ նաև իրեն ժպտացողներին, բայց ժպտալը լավ բան է»

Ողջու՛յն, այսօր իմ համեստ հյուրասրահում լրագրող-հաղորդավարուհի Նունե Այլանջյանն  է…

1. Սառը եղանակ` տաք սուրճ, թե՞ արև` սառը ֆրեշով:

Միանշանակ, արև ու նարնջի ֆրեշ:

2. Սփյուռքի,  թե՞ մշակույթի նախարարություն:  

Դուք ինձ սադրում եք, /ժպտում է /  Սփյուռքի նախարարություն, կարող եմ երկար պարզաբանել:

3. Լրագրություն, թե՞ քաղաքականություն:

Ցավոք,  հիմա այնպիսի տպավորություն է, որ դրանք առանց իրար չեն կարող գոյատևել, այդուհանդերձ՝ լրագրություն:

4. Ռադիո, թե՞ TV

Օ՜, երկու ոլորտում էլ ես ինձ զգում եմ ինչպես ձուկը ջրում, բայց՝ TV:

5. Ետ դարձի ճանապարհ կա՞:

Ոչ միշտ:

6. Անփոխարելիներ կա՞ն:

Այո, կան: Որոշ մարդիկ նման են գույների, որոնց ուրիշ գույնով չես կարող փոխարինել:

7. Փոփոխություններ, թե՞ ստաբիլություն:

Փոփոխություններ, որոնք դարձնում են քեզ ավելի լավը ու նպաստում առաջընթացին, բայց հարաբերություններում ստաբիլություն եմ սիրում:

8. «Դուք երբեք չեք ունենա երկրորդ հնարավորություն առաջին տպավորությունը ստեղծելու համար». Սա ըստ Կոկո Շանելի, իսկ ըստ՝ Նունե Այլանջյանի՞ … :

Ամեն ինչ հարաբերական է, իսկ առաջին տպավորությունը կարող է խաբուսիկ լինել:

9. Կնոջը հնարավո՞ր է հաղթել….

Կնոջը պետք է սիրել ու հարգել, իսկ հաղթել պետք է նախևառաջ ինքդ քեզ:

10. Ձեր հերոսը ֆիլմերից….

Հիմա՝ Ակվամեն

11. Եթե հանդիպեք նրան (ֆիլմի հերոսին)….

Կուզեի ընկերանայինք /ժպտում է/

12. Ինչի՞ մասին գիրք կգրեիք:

Չգիտեմ դեռ, բայց մի օր հաստատ գրելու եմ:

13. Ասում են՝ կյանքը պետք է ապրել այնպես, որպեսզի քեզ հիշեն նաև սրիկաները, այդ ինչպե՞ս պիտի ապրել :

Ինձ համար դա այդքան էլ կարևոր չէ, ես ուղղակի սիրում եմ ապրել, վայելել կյանքը, սիրել ու լինել երջանիկ: Կարծում եմ սրիկաներին այսքանը բավարար կլինի ինձ հիշելու համար: /ծիծաղում է/

14. Ինչի՞ համար կարող են Ձեզ ատել:

Ամբոխային մտածողություն չունենալու, բայց ասեմ, որ ինձ դա չի հուզում, որովհետև ես ավելի շատ շրջապատված եմ սիրով:

15. Իսկ սիրե՞լ…

Ուղղակի, Նունե Այլանջյան լինելու համար: Իսկապես, կան մարդիկ, ովքեր գնահատում են այն մարդկանց, ովքեր այնպիսին են, ինչպիսին կան:

16. Ինչպե՞ս ապրել,  երեկ-ը ժպիտով հիշելու համար.

Ժպտալ երեկ, այսօր ու վաղը: Թույլ չտալ, որ մանր-մունր միջադեպերն ու մարդիկ ազդեն ձեր տրամադրության վրա, որովհետև բոլոր այդ  մարդիկ անցողիկ են:

17. Ժպտա և կյանքը կժպտա քեզ… գեղեցիկ խոսքեր են, թե՞ այնուամենայնիվ ճշմարտություն կա դրա մեջ;

Կյանքը կարող է աքացի տալ նաև իրեն ժպտացողներին: Պետք է ուղղակի չընկճվել, բայց ժպտալը լավ բան է:

18. Երբ տխուր եք. ընկերներ,  թե՞ մի  քիչ կոնյակ:

Ընկերների հետ մի քիչ ռոմ կամ գինի /ժպտում է/

19. Զուգադիպություններ, թե՞ ճակատագիր ...

Ոչ զուգադիպությունների եմ առանձնապես հավատում, ոչ՝ ճակատագրի. ավելի շատ՝ նախախնամություն:

20. Ի՞նչ եք հասկանում հավատք ասելով:

Երևույթ, որ ի սկզբանե կա բոլորի ներսում, ուղղակի մեկնաբանություններն են տարբեր:

21. Հիմա ի՞նչ եք անում:

Մտածում եմ:

Եվ ես հիշելու եմ Պոզներին, բայց Ձեզ չեմ հարցնելու. եթե հանդիպեք Աստծուն, ի՞նչ կասեք նրան:

Շնորհակալ եմ... Ձեր ինքնատիպությամբ յուրահատուկ գույն բերեցիք իմ հյուրասրահ, մաղթում եմ, օրվա լավ շարունակություն:

Շնորհակալ եմ...